मी देवाला पाहिले
एका खंबीर मनात
त्या खंबीर मनाची
कृती खंबीरच क्षणात
मी देवाला पाहिले
अशा प्रामाणिक कानात
गर्हाणी अवघ्या विश्वाची
पचविती जात येत
मी देवाला पाहिले
अशा कष्टाळू पायात
उभं आयुष्य चालती
जीवनाच्या कर्तव्यात
मी देवाला पाहिले
अशा गोड मुखवाणीत
लळा लाऊनी जीवाला
जगविले सात्विक विचारात
मी देवाला पाहिले
अशा अनोख्या माणसात
ज्याची माणसात राहूनी
होती माणसाला साथ
- अमोल पाटील
(सन २०१४ मध्ये प्रकाशित अमोल पाटील लिखित 'इंद्रधनुष्य' या काव्यसंग्रहातून...)
No comments:
Post a Comment