सार्या जगाच धावणं
हुडकाया पोटाची भाकर
कशी भाकर थांबली
करुनी जगाला चाकर
अशा भाकरीची भूक
अवघ्या सृृष्टीच्या जीवाला
सारे धावती तिजसाठी
भूकेल्याचा ती निवाला
अशा भाकरीची कीर्ती
तिन्ही युगांत पाझरली
मला भाकरीची भीती
काही पोटाना ती विसरली
विसरल्या पोटाची गं किव
भाकरी तुला का येईना
कधी तूही त्यांच्यासाठी
का गं धावत जाईना
तुझं थोर भाकरीपण
ये गं गरिबीच्या दारी
तुझा कितीतरी सत्कार
होईल गरिबीच्या घरी
राजा मी रे काय करू
भाकर बोलाया लागली
माझा होतूया नाईलाज
जरी कितीही धावली
गरिबीकडं धावताना
काही माणसंच येत्यात
गरिबीपस्तूर पोहचताना
तेच मजला खात्यात
भाकर निर्जीवच होती
तिला गरिबीचा कळवळा
येथे सजीवच होते
सजीवाच्या भूकेचा अडथळा
- अमोल पाटील
(सन २०१४ मध्ये प्रकाशित अमोल पाटील लिखित 'इंद्रधनुष्य' या काव्यसंग्रहातून...)
No comments:
Post a Comment