मुक्काम | कविता | अमोल पाटील

पाऊलेच ठरविती

येथला मुक्काम अंती

पाऊलागनिक वाढे

येथली गती प्रगती

प्रगती घेते भरारी

असता आरंभ भारी

एक एक वीट येथे

घरा देतसे उभारी

असा आगळा वेगळा

जगी मुक्काम असावा

असण्याने आपल्या रे

जगती आनंद फुलावा

जगणेच नित्य असे

प्रेमळ सोज्वळ व्हावे

सुखाचे सर्वत्र गाणे

ओठात गुणगुणावे

मुक्काम असा सुंदर

सर्वाना नित्य लाभावा

या मुक्कामी आनंदाचा

जीवनी मळा फुलावा

- अमोल पाटील

(सन २०१८ मध्ये प्रकाशित अमोल पाटील लिखित 'मुक्त श्वास' या काव्यसंग्रहातून..)