अंतरीचे नभ | कविता | अमोल पाटील

सुख आनंदाचे क्षण

ज्याच्या त्याच्या हाती

विधात्याने देऊ केल्या

अंतरंगी दिव्य ज्योती

हा अंतरीचा प्रकाश

तारी उभ्या जीवनाला

अशा गोड प्रकाशात

भरती येई सुखाला

नाही कष्ट अपार

असा उपाय सुलभ

आनंदाचे रे किरण

पाहता अंतरी नभ

नाही कर्मकांड येथे

नाही भाबडा प्रचार

चित्ता स्थिर करण्याचा

असे येथला विचार

धावाधाव रे सरली

आणि सत्य उमगले

जेव्हा यत्ने प्रयत्नाने

नभा अंतरी पाहिले

- अमोल पाटील

( सन २०१८ मध्ये प्रकाशित अमोल पाटील लिखित 'मुक्त श्वास' या काव्यसंग्रहातून..)